Биыл алаулаған қысқа ғұмырында сирек ұшырасатын дарындылығымен заманынан дара тұлға, әйгілі саяхатшы Шоқан Шыңғысұлы Уәлихановтың туғанына 190 жыл толып отыр. Осы мерейлі жылға орай Арқалық қаласындағы облыстық №2 әмбебап ғылыми кітапханасында «Жұлдызы жарық тұлға» атты портреттік кеш өтті.

Тағылымды шарада Ш.Уәлиханов атындағы №1 жалпы білім беретін мектептің тарих пәнінің мұғалімі Кошанова Г.Б. ғалымның өміршең өмірі мен еңбектері жайлы баяндаса, Ш.Уәлиханов атындағы мектептің қазақ тілі мен әдебиеті пәнінің мұғалімі Байбосынова Т.С. қазақ әдебиеті мен мәдениетін басқа халықтарға таныстыруды мақсат тұтқан дара тұлғаның әдебиет саласына қосқан сүбелі үлесі жайлы тағылымды ой тарқатты.

Әбу Насыр әл - Фарабиден соң өз шыңын тұрғызған Шоқан Шыңғысұлына арналған жыр жолдары оқылып, әсем әндер шырқалған кеште, саналы ғұмырында сирек ұшырасатын рухани мұра қалдырған қазақ халқының тұңғыш ғалымы жайлы әдебиеттерден тұратын кітап көрмесі таныстырылды.

«Ғалымның хаты өлмейді, жақсының аты өлмейді» дегендей, өзі өмір сүрген дәуірінде ғалым да, жақсы да болған Шоқан Уәлиханов бабамыздың аты туған халқымен бірге мәңгі жасай бермек.