17.07.2025

Арқалық қаласындағы облыстық №2 әмбебап ғылыми кітапханасында жас ақын Еркінғазы Айтбаевтың төл туындысы — «Жанымның жинағы» атты жыр кітабының тұсаукесері өтті.

«Өлеңге әркімнің-ақ бар таласы», – деп ұлы Абай атамыз айтқандай, бала күнінен жыр әлеміне ынтық Еркінғазының бұл жинағы – оның жүрек үні мен шығармашылық арманын жүзеге асырған алғашқы қадамдарының бірі.

Кітаптың көркемдік сапасы жоғары, ерекше дизайнымен және заманауи QR-код технологиясымен ерекшеленеді — оқырмандар енді ақынның өлеңдерін тыңдап та тамашалай алады.

Кеш иесі бұл керемет жобаның жүзеге асуына мұрындық болған әріптесіміз Гүлзат Арманқызына алғысын білдірді.

Әдеби шараға жас ақынның ұстаздары, оқырмандары, сондай-ақ «AMANAT» партиясы Арқалық қалалық филиалының төрағасы Сабыржан Тасмағанбет және зиялы қауым өкілдері қатысты.

Бұл шара — Тобыл-Торғай өңірінің рухани өмірін байытып, жас таланттарға қанат бітіретін тағылымды кездесуге айналды.